ပင်လယ် သဘာဝ သန္တာကျောက်တန်းများကို ဝိုင်းဝန်း ထိန်းသိမ်းကြစို့

တနင်္သာရီ တိုင်းဒေသကြီး အတွင်းရှိ ကော့သောင်းဒေသသည် သဘာဝ ပထဝီအနေ အထားအရ ရှည်လျားသော ပင်လယ်ကမ်းရိုးတန်း၊ နူးညံ့သည့် သဲဖြူကမ်းစပ်များ ရှိသည့်ကျွန်းများ၊ အမျိုးစုံလင်လှသော သဘာဝ ပေါက်ပင်များ၊ ဒီရေတောများ၊ ကုန်းနေရေနေ သတ္တဝါများ၊ ငှက်မျိုးစိတ်များ၊ ပင်လယ်ရေအောက် သန္တာကျောက်တန်းများ ပေါကြွယ်ဝသဖြင့် ထူးခြားသော သဘာဝ အရင်းအမြစ်များ ပိုင်ဆိုင်လျက်ရှိပါသည်။

နိုင်ငံတော်၏ ခရီးသွားလုပ်ငန်း ဖွံ့ဖြိုးတိုးတက်လာမှုတွင် လာရောက် လည်ပတ်ကြသည့် ပြည်တွင်းပြည်ပ ခရီးသွားများ အားလုံးက ကော့သောင်း ခရိုင်ကျွန်းစုများတွင် စိမ်းလန်း ထူထပ်သည့် အမြဲစိမ်း (Ever GreenForest) သစ်တောကြီးများ၊ ကမ္ဘာ့ ရှားပါးကုန်းနေ၊   ရေနေဇီဝမျိုးစုံ မျိုးကွဲများ၊ အဏ္ဏဝါရေအောက် သန္တာကျောက်တန်း ရေမှော်ပင် အလှများဖြင့်   သဘာဝအလှမပျက် တည်ရှိနေပေရာ ထိုင်းနိုင်ငံ ဖူးခက်ဒေသထက် များစွာသာလွန် ကောင်းမွန်ကြောင်း မှတ်ချက်ပြု စကားသံ ကြားဖူးသည်။

သဘာဝခရီးသွား လုပ်ငန်းဈေးကွက်အား အဓိက ဆွဲဆောင်မှုတွင် ပင်လယ်ရေအောက် သန္တာကျောက်တန်း ရေမှော်ပင် (CORAL)များ သဘာဝအလှ မပျက်ယွင်းမှုသည်  အဓိက အခန်းကဏ္ဍမှ ပါဝင်ပေသည်။ သန္တာကျောက်တန်းများ (CORAL) ဖြစ်တည်လာစေရန် လုပ်ဆောင်ပေးသည့် သေးငယ်သည့် သန္တာကောင်လေး များသည် ဆီလင်တာရေးတား မျိုးပေါင်းစုတွင် အန်သိုဇိုအာမျိုး ပေါင်းပါဝင်သည်။ ပူနွေးသည့် သမုဒ္ဒရာ ရေတိမ်ပိုင်းတွင်   နေထိုင်ကျက်စားလေ့ ရှိသည်။ မူလအစမိခင် သန္တာကောင်သည် ရေထဲတွင် လွတ်လပ်စွာ သွားလာ ကျက်စားရာမှ အချိန်အတိုင်းအတာ တစ်ခုတွင် ကျောက်တုံးသို့မဟုတ် အခြားသန္တာ အသေကောင်များ၏ အရိုးပေါ်တွင် ငြိတွယ်ကာ တစ်နေရာမှ တစ်နေရာသို့ လှုပ်ရှား သွားလာခြင်း မပြုတော့ဘဲ ရေအောက် အပင်ကဲ့သို့ တည်ငြိမ်၍ လက်တံကဲ့သို့ အာရုံမှင်များ တဖြည်းဖြည်း ထွက်ပေါ်လာပြီး လက်လှမ်းမီရာ သက်ရှိသတ္တဝါ ကလေးများအား ဖမ်းယူစားသုံးပြီး ထုံးဓာတ်ထုတ်ကာ ကြီးထွားရင့်သန်လာ၍ သန္တာကျောက်တန်းများ (CORAL)များ ဖြစ်တည်လာကြသည်။ အချို့သော(CORAL)များသည် တစ်ကောင်တည်း သက်ထက်ဆုံး နေတတ်ကြသော်လည်း အများစုမှာ ကုဋေပေါင်း ထောင်သောင်းမက စုရုံးနေထိုင် တတ်ကြသဖြင့် တစ်ကောင်နှင့်တစ်ကောင် ခွဲခြား၍ မရနိုင်တော့ပေ။ မိခင် (CORAL)မှ အဖူးလေးများ၊ ခွက်ကဲ့သို့ကိုယ်ထည်များ၊ အာရုံမှင်များ ထွက်ပေါ်လာခြင်း၊ အဖူးများမှ အဖူးအသစ်များ ထပ်မံထွက်ပေါ်လာခြင်းဖြင့် အဆက်မပြတ် ပေါက်ပွားကြီး ပြင်းကာ တစ်ကောင်နှင့်တစ်ကောင် ဆက်၍ နှစ်ပေါင်းများစွာ ကြာသောအခါ  မိသားစုကြီး သဖွယ်ဖြစ်တည်လာခြင်းဖြစ်သည်။ ကုဋေပေါင်း များစွာသော မိခင် (CORAL)များမှ ကုဋေပေါင်း များစွာ ဥများအုချရာမှ ပေါက်ဖွားလာသည့် (CORAL) များ ပင်လယ်အတွင်း မျောပါရင်း ငြိတွယ်ချင်ရာတွင် ငြိတွယ်၍ ရာစုနှစ်ပေါင်းများစွာ အကြာတွင် အသစ် အသစ်သော(CORAL)များ ဖြစ်တည်လာကြခြင်း ဖြစ်သည်။

(CORAL)များသည် အချို့မှာ အရွက်သဏ္ဌာန်၊ အိုးကြီးများ သဏ္ဌာန်၊ ဆတ်ချိုများ သဏ္ဌာန်ဖြင့် ပုံသဏ္ဌာန် အမျိုးမျိုး အရောင်အသွေး အမျိုးမျိုးဖြင့် အလွန်လှပသော သမုဒ္ဒရာ ဥယျာဉ်ကြီးသဖွယ် ဖြစ်တည်လာခြင်းဖြစ်သည်။ (CORAL)များသည် ပင်လယ်သယံဇာတ မျိုးဆက်မပြတ်ရေး ငါးများ ပေါက်ပွားကြီးပြင်းရာ စားကျက်အဖြစ် အပြန်အလှန် အမှီသဟဲ ပြုရာ သဘာဝ ခရီးသွား လုပ်ငန်း၏ အဓိကသော့ချက် ပြယုဂ်လည်းဖြစ်သည်။  ကော့သောင်း ခရိုင်အတွင်းရှိ ပင်လယ်ကျွန်းများ တစ်ဝိုက်တွင် ငါးမျိုးစိတ် ၄၂ မျိုး၊  ကဏန်းမျိုးစိတ် ၄၂ မျိုး၊ အခွံမာ ခရုမျိုးစိတ် ၅ဝ မျိုး၊ ဂုံးယောက်မျိုးစိတ် ၄၁ မျိုး၊ ပင်လယ်မျှော့ ၃၅ မျိုး၊ ရေမှော် ၇၃ မျိုး၊ ရေညှိ ၁၁ မျိုးနှင့် ရေမှုန်ရေမွှား ပိုးကောင်မျိုးစိတ် ၃၃၃ မျိုးတို့ ရှင်သန်ပေါက်ပွား ကျင်လည် နေထိုင်ကြောင်း သုတေသန စာတမ်းများအရ လေ့လာသိရှိရသည်။ ကော့သောင်းဒေသ ကျွန်းများသို့ လာရောက်လည်ပတ်ကြသည့် ပြည်တွင်းပြည်ပ ခရီးသွားများသည် သမုဒ္ဒရာ ဥယျာဉ်ကြီးအတွင်း သဘာဝအလျောက် ဖြစ်ပေါ် ပေါက်ရောက်နေသည့် ပုံသဏ္ဌာန်စုံ၊   အရောင်အသွေးစုံ (CORAL) များအား ရေငုပ် (snorkeling)လုပ်ကာ လိုက်လံကြည့်ရှု မှတ်တမ်းတင်လိုသည့် အာသီသဖြင့် လာရောက်ကြသူ အများစုဖြစ်ကြောင်း သိရသည်။

ဤသို့ ရာစုနှစ်ပေါင်း များစွာ အချိန်ယူဖြစ်တည် လာခဲ့ရသည့် (CORAL) များရှိရာ ပင်လယ် ကျွန်းများတစ်ဝိုက် အသိပညာ ဗဟုသုတ နည်းပါးသည့် ရေလုပ်သားများ ၊ ဝိသမ စီးပွားရေး သမားများ အချို့ ဝါလတ် (ခေါ်) တရွတ်ဆွဲ ငါးဖမ်းပိုက်ဖြင့် ရေတိမ်ပိုင်းတွင် ငါးဖမ်းခြင်း ၊   ဗုံးခွဲငါးဖမ်းခြင်း ၊ ငါးဖမ်းလှေ ကျောက်ချရပ်နားခြင်းနှင့် ပင်လယ်အတွင်း စည်းကမ်းမဲ့ အမှိုက်စွန့်ပစ်မှု များကြောင့် ရေအောက်သဘာဝ (CORAL) အလှများနှင့် ရေနေရှားပါး သတ္တဝါ မျိုးစိတ်အချို့ ပျက်စီးပျောက်ကွယ်မည့် ကြီးစွာသော စိန်ခေါ်မှု တစ်ရပ်ရင်ဆိုင် နေရပြီဖြစ်သည်။ ယနေ့ Globalization ခေတ်တွင် ပြိုင်ဆိုင်မှု လွန်စွာ အဆင့်မြင့်မားလာခြင်း များနှင့်အတူ နိုင်ငံတော်အတွက် ကန့်သတ်မဲ့ ဝင်ငွေများစွာ ဝင်ရောက်လာမည့် ပင်လယ် ကမ်းရိုးတန်းဒေသ သဘာဝ ခရီးသွား လုပ်ငန်းကဏ္ဍ၏ အသက်သွေးကြော (CORAL)များ မျိုးသုဉ်း မပျောက်ကွယ်ရေး ဒေသခံ ဟိုတယ်နှင့် ခရီးသွား လုပ်ငန်းကုမ္ပဏီ အချို့မှ အသိပညာပေးမှု လုပ်ငန်းများ တစ်ပိုင်တစ်နိုင် ဆောင်ရွက်လျက် ရှိသော်လည်း အကျိုးသက်ရောက်မှု နည်းလျက်ရှိနေပေရာ ခရီးသွား ဧည့်သည်များ အလွှာမှသည် အခြေခံ ပင်လယ်ရေလုပ်သားများ၊ ပင်လယ်ကမ်းစပ် ကျေးရွာနေ ပြည်သူများ အလွှာထိတိုင်   အသိပညာပေး လုပ်ငန်းများ ဝိုင်းဝန်းဆောင်ရွက် ကြစေရန် တိုက်တွန်းရေးသား အပ်ပါသည်။

ကျော်စိုး(ကော့သောင်း)

Read 47 times
Rate this item
(0 votes)