SJ WorldNews - шаблон joomla Авто

အာရှအဆင့်ရှိ အကြီးဆုံး အအေးခန်း သိုလှောင်ဖြန့်ချိရုံကြီးကို သီလဝါအထူးစီးပွားရေးဇုန် (A)၌ဖွင့်လှစ်

Wednesday, 13 June 2018 15:43 font size decrease font size decrease font size increase font size increase font size

ရန်ကုန်    ဇွန်    ၁၂

စိုက်ပျိုးရေး/ရေထွက်နှင့်  အခြားဓာတုပစ္စည်းများအား Export/ Import သိုလှောင်  ဖြန့်ချိသွားမည့် အာရှအဆင့်ရှိ  မြန်မာနိုင်ငံ၏ အကြီးဆုံး အအေးခန်း သိုလှောင်ဖြန့်ချိရုံကြီး ကို ယနေ့ နံနက် ၉ နာရီခွဲတွင် ရန်ကုန်တိုင်းဒေသကြီး သန်လျင် ကျောက်တန်းဒေသ သီလဝါအထူးစီးပွားရေးဇုန်(ဗ)၌  ဖွင့်လှစ်လိုက်ပြီဖြစ်သည်။

အဆိုပါအဆင့်မြင့် သိုလှောင်ရုံကြီးသည် ဂျပန်နည်းပညာကို အသုံးပြုကာ အပူချိန်အမျိုးမျိုးကို ထိန်းညှိပေး၍ ကုန်ပစ္စည်းအမျိုးမျိုးအား သိုလှောင်ပေးနိုင်ပြီး  ဂျပန်နိုင်ငံ၏ ၁ဝဝ ရာခိုင်နှုန်းပြည့်   ရင်းနှီးမြှုပ်နှံမှု လုပ်ငန်းကြီး တစ်ခုဖြစ်ကြောင်း သိရသည်။

အခမ်းအနားတွင် ရန်ကုန်တိုင်းဒေသကြီး အစိုးရအဖွဲ့ဝင် စီမံကိန်းနှင့် ဘဏ္ဍာရေးဝန်ကြီး ဦးမြင့်သောင်း၊ မြန်မာ့ဆိပ်ကမ်း အာဏာပိုင် ဦးဆောင်ညွှန်ကြားရေးမှူး ဦးနီအောင်၊ မြန်မာနိုင်ငံဆိုင်ရာ   ဂျပန်နိုင်ငံ သံအမတ်ကြီးနှင့် Ryobi Myanmar Distribution Service Co.,Ltd. မှ  မန်နေးဂျင်းဒါရိုက်တာတို့က  ဖဲကြိုးဖြတ်ဖွင့်လှစ်ပေးပြီး အအေးခန်း သိုလှောင်ရုံကြီး၏ အပူအအေးပေး စနစ်များနှင့် ပစ္စည်းများ သိုလှောင်ထားရှိသွားမည့် အခြေအနေများအား လှည့်လည်ကြည့်ရှု လေ့လာကြသည်။

အကြီးဆုံးအအေးခန်း သိုလှောင်ဖြန့်ချိရုံကြီးသည် အကျယ်အဝန်း  စတုရန်းမီတာ  ၅ဝဝဝဝကျော်သော မြေနေရာ၌ Frozen, Chilled, Aircon,Dry စသည်ဖြင့် အပူချိန်အမျိုးမျိုး ထောက်ပံ့နိုင်သော၊ စုစုပေါင်းဧရိယာ ၃၆ဝဝဝ စတုရန်းမီတာ ကျယ်ဝန်းသော အကြီးဆုံးအအေးခန်း သိုလှောင်ဖြန့်ချိရုံကြီးဖြစ်ကာ မြန်မာနိုင်ငံတွင် အကြီးဆုံးဖြစ်ကြောင်း၊ သဘာဝပတ်ဝန်းကျင်အတွက် သင့်လျော်သော နောက်ဆုံးပေါ် လေအေးပေးစနစ်ဖြစ်သည့် အမိုးနီးယားနှင့် ကာဗွန်ဒိုင်အောက်ဆိုက် လေအေးပေးစနစ်ကို ထည့်သွင်း အသုံးပြုထားကြောင်း၊ ယင်းစနစ်သည် မြန်မာနိုင်ငံတွင် ပထမဆုံး အသုံးပြုသည့်စနစ်ဖြစ်ကြောင်း၊ ၄၈ နာရီ လျှပ်စစ်ဓာတ်အား ထောက်ပံ့ပေးနိုင်သော System ပါဝင်သောကြောင့် လျှပ်စစ်ဓာတ်အား ပြတ်တောက်ခြင်းမှ ကာကွယ်နိုင်ကြောင်း သိရသည်။

ထို့ပြင်  ၎င်းသိုလှောင်ဖြန့်ချိရေး အဆောက်အအုံသည်  အထပ်နှစ်ထပ်ပါရှိပြီး ပထမထပ်  ကုန်တင်ယာဉ်အစီး ၂ဝ၊ ဒုတိယထပ်အစီး ၂ဝ တစ်ပြိုင်တည်း ကုန်တင်ကုန်ချ ပြုလုပ်နိုင်သဖြင့်လက်ရှိအချိန်တွင် မြန်မာနိုင်ငံ၌ အကြီးဆုံး အအေးခန်း သိုလှောင်ဖြန့်ချိရုံကြီးအဖြစ် ရပ်တည်လျက်ရှိကြောင်းသိရသည်။

Read 38 times Last modified on Wednesday, 13 June 2018 15:44