SJ WorldNews - шаблон joomla Авто

မြန်မာ-တရုတ် နှစ်နိုင်ငံ ဆက်ဆံရေးနှင့် ပူးပေါင်း ဆောင်ရွက်မှု တိုးမြှင့်ရေး ဆွေးနွေး

Wednesday, 11 July 2018 10:12 font size decrease font size decrease font size increase font size increase font size

နေပြည်တော်   ဇူလိုင်   ၁ဝ

နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် တရုတ်ကွန်မြူနစ်ပါတီ   ပေါ်လစ်ဗျူရို အဖွဲ့ဝင်  အတွင်းရေးမှူးချုပ်ရုံး၏ အတွင်းရေးမှူးနှင့် ဗဟိုကော်မတီ၏ ပြန်ကြားရေးဌာန ဝန်ကြီး H.E. Mr. Huang   Kunming ဦးဆောင်သော အဖွဲ့အား ယနေ့နံနက် ၁ဝ နာရီတွင် နေပြည်တော်ရှိ   နိုင်ငံတော်သမ္မတ အိမ်တော်   သံတမန်ဆောင် ဧည့်ခန်းမ၌ လက်ခံတွေ့ဆုံသည်။

တွေ့ဆုံစဉ် မြန်မာ-တရုတ် နှစ်နိုင်ငံဆက်ဆံရေးနှင့် ပူးပေါင်း ဆောင်ရွက်မှု တိုးမြှင့်ရေး၊ အထူးသဖြင့် နှစ်နိုင်ငံအကြား ယဉ်ကျေးမှုနှင့် ပြန်ကြားရေးကဏ္ဍတို့တွင် နီးကပ်စွာ ပူးပေါင်း ဆောင်ရွက်ရေးတို့နှင့် စပ်လျဉ်း၍ ရင်းနှီး ပွင့်လင်းစွာ ဆွေးနွေးကြသည်။

တွေ့ဆုံပွဲသို့ ပြန်ကြားရေးဝန်ကြီးဌာန ပြည်ထောင်စုဝန်ကြီး ဒေါက်တာဖေမြင့်၊ သာသနာရေးနှင့် ယဉ်ကျေးမှုဝန်ကြီးဌာန ပြည်ထောင်စုဝန်ကြီး သူရဦးအောင်ကို၊ အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီးဌာန  ပြည်ထောင်စုဝန်ကြီး   ဦးကျော်တင်၊ သမ္မတရုံး ဝန်ကြီးဌာန ဒုတိယဝန်ကြီး ဦးမင်းသူနှင့် တာဝန်ရှိသူများ တက်ရောက်ကြသည်။

အလားတူ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် ကမ္ဘာ့ဘဏ်၏ အရှေ့အာရှနှင့် ပစိဖိတ်ဒေသဆိုင်ရာ ဒုတိယ ဥက္ကဋ္ဌ Ms. Victoria Kwakwa ဦးဆောင်သည့် ကိုယ်စားလှယ်အဖွဲ့အား နံနက် ၁၁ နာရီခွဲတွင် နိုင်ငံခြားရေး ဝန်ကြီးဌာန ဧည့်ခန်းမ၌ လက်ခံတွေ့ဆုံသည်။

ထိုသို့တွေ့ဆုံစဉ်  ကမ္ဘာ့ဘဏ် ဒုတိယဥက္ကဋ္ဌက မြန်မာနိုင်ငံ၏ ငြိမ်းချမ်းရေး လုပ်ငန်းစဉ်၊ လူမှုရေးနှင့် စီးပွားရေးအသွင် ကူးပြောင်းရေး လုပ်ငန်းစဉ်များအတွက်  ကမ္ဘာ့ဘဏ်မှ ကူညီပံ့ပိုးမှုများ ပေးအပ်သွားမည်ဖြစ်ကြောင်း ကမ်းလှမ်းပြောကြားခဲ့ပြီး ကမ္ဘာ့ဘဏ်မှ မြန်မာနိုင်ငံသို့ လာမည့်နှစ်နှစ်အတွင်း ပေးအပ်မည့် ဘဏ္ဍာငွေပံ့ပိုးမှု အစီအစဉ်များ ရေးဆွဲရေးနှင့် ပတ်သက်၍ ဦးစားပေး ကဏ္ဍများအပေါ် အမြင်ချင်းဖလှယ် ဆွေးနွေးကြသည်။ မြန်မာနိုင်ငံ၏ ရေရှည်ဖွံ့ဖြိုး တိုးတက်ရေး စီမံချက် (Myanmar Sustainable Development Plan - MSDP) တွင် ပါဝင်သော ရည်မှန်းချက်များနှင့်အညီ ရေရှည်ဖွံ့ဖြိုး တိုးတက်ရေးကို ကြိုးပမ်းဆောင်ရွက်ရာတွင် ကမ္ဘာ့ဘဏ် အနေဖြင့် နည်းပညာနှင့် ဘဏ္ဍာငွေပံ့ပိုးမှုများ ဆက်လက် ပေးအပ်သွားမည့် ကိစ္စများနှင့် ငြိမ်းချမ်းရေး ရရှိလာသည့်ဒေသများတွင် ဖွံ့ဖြိုးတိုးတက်ရေးနှင့်  အလုပ်အကိုင် အခွင့် အလမ်းများ ဖန်တီးပေးရေးတို့ကို အကူအညီပေး ဆောင်ရွက်သွားရန်လည်း ဆွေးနွေးကြသည်။

ထို့ပြင် ရခိုင်ပြည်နယ်မှ နေရပ်စွန့်ခွာသွားသူများအား ပြန်လည်လက်ခံရေး၊ နေရာချ ထားရေးလုပ်ငန်းစဉ်တို့နှင့် ပတ်သက်၍ လည်းကောင်း၊ ရခိုင်ပြည်နယ်အပါအဝင် ပဋိပက္ခ အခြေအနေများကြောင့် ထိခိုက်ခံစားရသူများ အားလုံးနှင့် အသိုက်အဝန်း အားလုံးအတွက် အကျိုးဖြစ်ထွန်းစေမည့်   စီးပွားရေး အခွင့်အလမ်းများ ဖန်တီးရေး၊ အသေးစားနှင့် အငယ်စား လုပ်ငန်းများ ဖွံ့ဖြိုးတိုးတက်အောင် ဖန်တီးရေး၊ အရေးပါသည့် လူမှုဝန်ဆောင်မှု အထောက်အပံ့များ ရရှိနိုင်ရေး စသည့် အစီအမံများအတွက် အထောက်အပံ့များ ပေးအပ်နိုင်မည့် စီမံချက်များနှင့် ပတ်သက်၍ လည်းကောင်း   အမြင်ချင်းဖလှယ် ဆွေးနွေးကြသည်။

ဆွေးနွေးပွဲသို့ အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီးဌာန ပြည်ထောင်စုဝန်ကြီး ဦးကျော်တင်၊ စီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီး ဦးဆက် အောင်နှင့် နိုင်ငံခြားရေး ဝန်ကြီးဌာနမှ အဆင့်မြင့် အရာရှိကြီးများ တက်ရောက်ကြသည်။

(သတင်းစဉ်)

Read 43 times Last modified on Wednesday, 11 July 2018 10:13