SJ WorldNews - шаблон joomla Авто

ကောင်းသော ကုန်သွယ်မှုနှင့် ပြည်သူ့ကျန်းမာရေး

Sunday, 26 November 2017 12:43 font size decrease font size decrease font size increase font size increase font size

မြန်မာနိုင်ငံစီးပွားရေးစနစ်သည် ဈေးကွက်စီးပွားရေးစနစ်ဖြစ်သည့်အားလျော်စွာ နယ်စပ် ကုန်သွယ်ရေး  လမ်းကြောင်းများတွင် တရားမဝင် ကုန်စည်များ ထိန်းချုပ်ရေးအတွက် ရေပူနှင့် မရမ်းချောင် အမြဲတမ်း စစ်ဆေးရေး စခန်းတို့ကို ဌာနဆိုင်ရာ ပူးပေါင်းအဖွဲ့များဖြင့် မတ် ၁ရက်တွင် စတင်ဖွင့်လှစ် ဆောင်ရွက်ခဲ့သည်။ နယ်စပ်ကုန်သွယ်ရေးလမ်းကြောင်းများမှ နိုဝင်ဘာ ၂၂ ရက်တွင်  မန္တလေး-မူဆယ် ပြည်ထောင်စု လမ်းမကြီးတစ်လျှောက် ကုန်သွယ်မှု ယာဉ်ပို့ကုန် ၉၁၈ စီး၊ သွင်းကုန် ၉၄၅ စီးနှင့် ရန်ကုန်-မြဝတီလမ်းမကြီး တစ်လျှောက် ကုန်သွယ်မှုယာဉ်ပို့ကုန် ၄၈ စီး၊ သွင်းကုန် ၁၂၇ စီးတို့က ကုန်စည်များသယ်ယူပို့ဆောင် ပေးလျက်ရှိသည်။

နယ်စပ်ကုန်သွယ်ရေးလမ်းကြောင်းများရှိ စစ်ဆေးရေးစခန်းများက သွင်းကုန်၊ ပို့ကုန်ပစ္စည်းများကို စစ်ဆေး ဆောင်ရွက်လျက်ရှိရာ နိုဝင်ဘာ ၂၂ ရက်တွင် ရေပူအမြဲတမ်း စစ်ဆေးရေးစခန်းက တားဆီးမှုရှစ်မှု (ခန့်မှန်းတန်ဖိုးငွေကျပ် ၃ဝ ဒသမ ၇၈၁ သန်းခန့်)သိမ်းဆည်းရမိခဲ့သည်။

ကုန်သွယ်မှုတွင် တရားဝင်ကုန်သွယ်မှု၊ တရားမဝင်ကုန်သွယ်မှု၊ မှောင်ခိုကုန်သွယ်မှုဟူ၍ ခွဲခြားထားသည်။ တရားမဝင်ကုန်သွယ်မှုနှင့် မှောင်ခိုကုန်သွယ်မှုဟုဆိုလျှင် တရားမဝင်ရုံမျှ မဟုတ်ဘဲ မမှန်ကန်သည့် နည်းလမ်းဖြင့် လုပ်ဆောင်ခြင်းဖြစ်သည်။   ယေဘုယျအားဖြင့် နိုင်ငံတကာစည်းမျဉ်း စည်းကမ်းများအရ ခွင့်ပြုထားသည့် ကုန်စည်များကို ခွင့်ပြုထားသည့် ဝင်ပေါက်များ၊ နယ်စပ်ဂိတ်များမှ ကုန်သွယ်ခြင်းသည် တရားဝင်ကုန်သွယ်ရေးဖြစ်သည်။ တရားမဝင်ဟုဆိုလျှင် ခွင့်ပြုမထားသည့်လမ်းကြောင်းများမှတစ်ဆင့် ကုန်သွယ်ခြင်းဖြစ်ပြီး မှောင်ခိုကုန်သွယ်မှုဟုဆိုလျှင် ခွင့်ပြုမထားသည့် ကုန်စည်များကို   ခွင့်ပြုမထားသည့် လမ်းကြောင်းများမှ ကုန်သွယ်ခြင်းဖြစ်သည်။ တရားမဝင်ကုန်သွယ်မှုဟုဆိုလျှင် နှစ်ခုစလုံး အကျုံးဝင် သော်လည်း မှောင်ခိုဟုခေါ်သည့် နှစ်နိုင်ငံစလုံးက ခွင့်ပြုမထားသော မူးယစ်ဆေးဝါး၊ လက်နက်၊ ခဲယမ်းမီးကျောက်၊ လူနှင့်တိရစ္ဆာန်များကို ကုန်သွယ်မှုတို့သည် ဒေသတွင်း ဘေးကင်းလုံခြုံမှုနှင့် မတည်ငြိမ်မှုတို့ကို ပါထိခိုက်နိုင်သဖြင့် အန္တရာယ်ကြီးမားကြောင်း ပညာရှင်များက ထောက်ပြထားကြ သည်။

တရားမဝင်ကုန်သွယ်ရေးသည် တိုင်းပြည်ဝင်ငွေ GDP တွင် မပါဝင်သည့်အပြင်  အရည်အသွေးစစ်ဆေးမှု မရှိသော ပို့ကုန်/သွင်းကုန်များသည် စားသုံးသူများအတွက် ဘေးကင်း လုံခြုံမှုမရှိပေ။ စားသုံးရန် မသင့်သည့် စားသောက်ကုန်များ၊ သက်တမ်းလွန်နှင့် ပစ္စည်းအတုများကြောင့် ပြည်သူများ၏ ကျန်းမာရေးကို ထိခိုက်နိုင်သည်။ ဓာတုလွန်ကဲသည့် ဓာတ်မြေသြဇာများကြောင့် သဘာဝမြေဆီလွှာ ပျက်စီးမှုနှင့် အရည်အသွေးမမီသည့် ဘိလပ်မြေ၊ သံနှင့် သံထည်ပစ္စည်းစသည်တို့ကြောင့်လည်း ပြည်သူတို့အတွက် ဘေးအန္တရာယ်ကြုံတွေ့ရ နိုင်သည်။ နိုင်ငံတော်တွင် တရားမဝင်ကုန်သွယ်မှု လျော့ကျ စေပြီး အသေးစားကုန်သည်များ အနေဖြင့်တရားဝင်ကုန်သွယ်နိုင်ရန်နှင့်   နိုင်ငံတော်အတွက်ရသင့်သော အခွန်ရရှိ စေရန်  တစ်ဦးချင်းကုန်သွယ်ခွင့်လက်မှတ် (ITC) များထုတ်ပေးပြီး  ရက်သတ္တတစ်ပတ်လျှင် သိန်း တစ်ရာတန်ဖိုးအထိ ကုန်သွယ်စေခြင်းဖြင့် အသေးစားကုန်သည်များအတွက်  အဆင်ပြေလာ ကြသည်။ သို့သော်ကိုယ်ကျိုးစီးပွားအတွက် တရားမဝင် ကုန်သွယ်မှုကြီးကြီးမားမာ လုပ်နေကြသည့် ကုန်သည်ကြီးများ ရှိနေခြင်းကြောင့် တရားမဝင်ကုန်သွယ်မှုကြီးထွားရှင်သန် နေခြင်းဖြစ်သည်။

ယနေ့ကမ္ဘာ့ပြည်သူများအတွက် အစာလည်းဆေး၊ ဆေးလည်းအစာဟူသောစကား  ရာနှုန်းပြည့် မမှန်နိုင် တော့ကြောင်း တွေ့ရပေမည်။ ကမ္ဘာ့ကျန်းမာရေးအဖွဲ့ (WHO)က ထုတ်ပြန်သော စာရင်းများအရ အစား အသောက်ကြောင့် ဖြစ်သောရောဂါနှင့်  သေဆုံးသူဦးရေသည် နှစ်စဉ် ၂ ဒသမ ၂ သန်းဝန်းကျင်ရှိသဖြင့် စားသောက်ဖွယ်ရာများကို ကိုင်တွယ် ပြင်ဆင်ချက်ပြုတ်ရာတွင်လည်းကောင်း၊ သိုလှောင်ရာတွင် လည်းကောင်း သန့်ရှင်းသပ်ရပ်မှု မရှိလျှင် အစာသည်ဆေးမဖြစ်ဘဲ ဘေးဖြစ်နိုင်ကြောင်းကိုလည်း သတိ ပေးထားသည်။ ကုန်ထုတ်လုပ်မှု ပြိုင်ဆိုင်မှုနှင့် ဈေးကွက်ပြိုင်ဆိုင်မှုတို့ကြောင့် စီးပွားရေးနှင့် လူမှုရေး ပတ်ဝန်းကျင်သစ်များ ပြောင်းလဲလျက်ရှိသည့်အပြင် ဗက်တီးရီးယား ရောဂါပိုးမွှားနှင့် အဆိပ်အတောက် ဖြစ်စေမှု တို့ကလည်း ပျံ့နှံ့လျက်ရှိရာ အစားအသောက် ဘေးအန္တရာယ် ကင်းရှင်းရေး (Food Security) ကို အထူး အလေးထားကြရမည်ဖြစ်သည်။ အီဘိုလာရောဂါဖြစ်စေသည့် အကြောင်းကို ကနဦးလေ့လာ တွေ့ရှိချက်မှာ မသန့်ရှင်းသော တောကောင်သားကို စားမိခြင်းကြောင့်ဖြစ်သည်ဟုဆိုထားသည်။

သို့ဖြစ်၍ ကောင်းသောကုန်သွယ်မှုနှင့် အသက်မွေးကြရာတွင် နိုင်ငံတော်ကထုတ်ပြန် ထားသောဥပဒေ၊ နည်းဥပဒေ၊ အမိန့်၊ ညွှန်ကြားချက်တို့ကို လေးစားလိုက်နာစစ်ဆေးခံကြ ရန်နှင့်  ပြည်သူတို့၏ ကျန်းမာရေးကို လည်း  အလေးထားကြရန် လိုကြောင်း  မြဝတီက တိုက်တွန်းနှိုးဆော် လိုက်ရပါသည်။ ။

.....................

 

Read 38 times Last modified on Sunday, 26 November 2017 12:53