SJ WorldNews - шаблон joomla Авто

ကုန်းပေါ်မှာသစ်ကားနှင့်မူးယစ်ဆေးဝါး ရေထဲမှာအလစ်သမား

Thursday, 10 August 2017 08:37 font size decrease font size decrease font size increase font size increase font size

မြန်မာမှုနယ်ပယ်တွင် သတိမမူဂူမမြင်ဟူသော ဝေါဟာရသည် လူတို့၏အတွေ့အကြုံမှ ပေါက်ဖွားလာသော စကားပုံဖြစ်သည်။ သတိဟူသော ဝေါဟာရသည် ပါဠိဘာသာမှ ဆင်းသက်လာပြီး တစ်စုံတစ်ခုသော အာရုံကိုအစဉ်မပြတ်သိနေခြင်း၊

အောက်မေ့ခြင်း၊ အမှတ်ရခြင်းတို့ကို သတိဟုခေါ်ဆိုခြင်း ဖြစ်သည်။ မည်သည့်အလုပ်ကိစ္စမဆို သတိနှင့်ယှဉ်သော ပြုလုပ်မှုသည် ကောင်းကျိုးရရှိစေပြီး သတိကင်းလွတ်နေကြပါမူ ဆိုးကျိုးခံစားကြရမည်ဖြစ်သည်။

လူတိုင်း နေ့စဉ်စားဝတ်နေမှု လုံအောင်ပြုဖို့ ရုန်းကန်လှုပ်ရှားကြရသည်။ နိုင်ငံတစ်နိုင်ငံ အတွင်းရှိ ပြည်သူအားလုံးတို့၏ စားဝတ်နေမှု လုံအောင်ပြုကြရလေသော အခါ လုံခြုံရေး၏ အဓိပ္ပာယ် ပို၍ကျယ်ပြန့်လာသည်။

ပြည်သူတစ်ဦးချင်းစီ၏ အရေးတို့ကို စုပေါင်းလိုက်သောအခါ နိုင်ငံသားတို့အရေး တစ်နည်းအားဖြင့် နိုင်ငံရေးဟူသော အဓိပ္ပာယ်ကိုဆောင်သည်။ ထို့ကြောင့် နိုင်ငံသားတို့ အရေးကို အဓိကအားဖြင့် နိုင်ငံရေး၊ စီးပွားရေး၊ လူမှုရေးဟူသော ကဏ္ဍကြီး(၃)ရပ်ဖြင့် နိုင်ငံတော်အစိုးရက ဖွံ့ဖြိုးတိုးတက်အောင် ဆောင်ရွက်ကြရသည်။

ဤသို့ဆောင်ရွက်ရာတွင် ကျန်းမာသန်စွမ်းသော လူတစ်ဦးဖြစ်ရန် အသည်းနှလုံးအဓိကပမာ လွတ်လပ်ရေးနှင့် အချုပ်အခြာအာဏာ ပိုင်စိုးရေးသည် ပြည်သူတို့၏ လူမှုစီးပွားဘဝ ဖွံ့ဖြိုးတိုးတက်မှု လုံခြုံရေးအတွက် ပဓာန လိုအပ်ချက်ဖြစ်သည်။

ပြည်သူတို့၏ လူမှုစီးပွားဘဝ ဖွံ့ဖြိုးတိုးတက်မှုလုံခြုံရေးသည် လူတစ်ဦးချင်း လုံခြုံရေး၊ စားရေရိက္ခာလုံခြုံရေး၊ စီးပွားရေးလုံခြုံရေး၊ ကျန်းမာရေးလုံခြုံရေး၊ ပတ်ဝန်းကျင်လုံခြုံရေး  စသည့်လူမှုရေးရာ အဖြာဖြာအပါအဝင် နိုင်ငံတော်လုံခြုံရေးအထိ အကျုံးဝင်သည်။   ထို့ကြောင့် မြန်မာပြည်သူအပေါင်းတို့ လူမှုစီးပွားဘဝ ဖွံ့ဖြိုးတိုးတက်မှု လုံခြုံရေးအတွက် ဥပဒေပြုရေး၊ အုပ်ချုပ်ရေးနှင့် တရားစီရင်ရေး တာဝန်အရပ်ရပ်ကို နိုင်ငံတော်အစိုးရ၊ လွှတ်တော်၊ ပြည်သူနှင့်တပ်မတော်တို့ လက်တွဲဆောင်ရွက်နေကြခြင်းဖြစ်သည်။ ပြည်သူအပေါင်းတို့၏ လူမှုစီးပွားဘဝ ဖွံ့ဖြိုးတိုးတက်ရေးအတွက် အိမ်နီးချင်းနိုင်ငံများ၊ ဒေသတွင်းနိုင်ငံများ၊ ကမ္ဘာ့နိုင်ငံများနှင့် အစိုးရအချင်းချင်း ပူးပေါင်းဆောင်ရွက်မှု အနေဖြင့် နိုင်ငံဖြတ်ကျော်မှုခင်းများ တားဆီးကာကွယ်ရေး၊ မူးယစ်ဆေးဝါး တိုက်ဖျက်ရေး၊ အကြမ်းဖက်နှိမ်နင်းရေး၊ သဘာဝဘေးအန္တရာယ်နှင့် ကြုံတွေ့နေရသော ပြည်သူများအား ကူညီကယ်ဆယ် ထောက်ပံ့ရေးတို့ကို ဆောင်ရွက်လျက်ရှိသည်။ မျက်မှောက်ကာလ ကမ္ဘာ့နိုင်ငံများမှ ပြည်သူတို့သည် ဆိုခဲ့သော ဘေးဒုက္ခများအပြင် ကပ်ရောဂါအသွင် ကူးစက်ရောဂါဖြစ်ပွားမှုနှင့် ဆိုက်ဘာတိုက်ခိုက် ခံရမှုများပါ ကြုံတွေ့နေကြရသဖြင့် လူမှုစီးပွားဖွံ့ဖြိုး တိုးတက်မှုအတွက် လုံခြုံရေး၏ အဓိပ္ပာယ်ပိုမိုကျယ်ပြန့်လာသည်ကို သတိမူကြရန် အထူးအရေးကြီးသည်။

တိုင်းရင်းသားပြည်သူ အပေါင်းတို့၏ လူမှုစီးပွားဘဝ ဖွံ့ဖြိုးတိုးတက်မှုအတွက် လုံခြုံရေးတာဝန်ကို တပ်မတော်က ထမ်းဆောင်လျက်ရှိရာ ရှမ်းပြည်နယ်(မြောက်ပိုင်း) နမ့်ခမ်းမြို့နယ်အတွင်း နယ်မြေလုံခြုံရေး ဆောင်ရွက်နေသော တပ်မတော်စစ်ကြောင်းသည် သြဂုတ် ၆ ရက် နံနက် ၇ နာရီခွဲခန့်တွင် ဟိုနားကျေးရွာအနီးသို့ အရောက်၌ လမ်းဘေးချုံများအတွင်း ရပ်တန့်ထားသော ယမ်းဖောင်အမျိုးအစား ခြောက်ဘီး မော်တော်ယာဉ်သုံးစီးနှင့် ယာဉ်များပေါ်တွင် တင်ဆောင်ထားသော စံကားဝါသစ် အမျိုးအစား ၅ တန်ခန့်နှင့် ကျွန်း၊ သစ်မာခွဲသားဆိုဒ်စုံ ၁၉ တန်ခန့်တို့အား ပိုင်ရှင်မဲ့ သိမ်းဆည်းရမိခဲ့သည်။ အလားတူ ညနေ ၄ နာရီ ၁ဝ မိနစ်ခန့်တွင် ဟိုနားကျေးရွာ၏ အရှေ့ဘက် မီတာ ၁ဝဝဝ သို့အရောက်၌ လမ်းဘေးချုံများအတွင်း ရပ်တန့်ထားသော ယမ်းဖောင်အမျိုးအစား ခြောက်ဘီးမော်တော်ယာဉ် ၁၂ စီးနှင့် ယာဉ်များပေါ်တွင် တင်ဆောင်ထားသော ကျွန်း၊ သစ်မာခွဲသားဆိုဒ်စုံ ၅၁ တန်ကျော်အား ထပ်မံတွေ့ရှိ သိမ်းဆည်းရမိခဲ့သဖြင့် ယာဉ်များနှင့်သစ်များအား နမ့်ခမ်းမြို့ သစ်တောဦးစီးဌာနသို့ စနစ်တကျလွှဲပြောင်း အပ်နှံခဲ့သည်။

ရှမ်းပြည်နယ်(မြောက်ပိုင်း) လားရှိုးမြို့ ရေပူစစ်ဆေးရေးဂိတ်၌ လုံခြုံရေး ဆောင်ရွက်နေသော တပ်မတော်သားများနှင့် ဌာနဆိုင်ရာတာဝန်ရှိသူများ ပါဝင်သော ပူးပေါင်းအဖွဲ့သည် သြဂုတ် ၆ ရက် နံနက် ၆ နာရီခွဲတွင်  မူဆယ်ဘက်မှ လားရှိုးဘက်သို့ မောင်းနှင်လာသော ယာဉ်တစ်စီးကို  ရပ်တန့်စစ်ဆေးရာ  ယာဉ်ပေါ်မှ အချိုရည်ဘူး၊ ဘီယာဘူးများအတွင်း ဓာတ်မြေသြဇာနှင့် C4 ယမ်းပေါင်းစပ်ထားသည့် အတုံး ၂၅ တုံးဖမ်းဆီး ရမိခဲ့သည်။ ရှမ်းပြည်နယ်(တောင်ပိုင်း) နမ့်စန်မြို့ရှိ မြို့မရဲစခန်းအနီး တောင်ကြီး-နမ့်စန်-ကျိုင်းတုံသွား ပြည်ထောင်စုလမ်းမကြီး၌ တပ်မတော်သားများ၊ မြန်မာနိုင်ငံ ရဲတပ်ဖွဲ့ဝင်များနှင့် ဌာနဆိုင်ရာ တာဝန်ရှိသူများ ပါဝင်သော ပူးပေါင်းအဖွဲ့သည် သြဂုတ် ၆ ရက် မွန်းလွဲပိုင်းတွင် မော်တော်ယာဉ်တစ်စီးကို ရပ်တန့်စစ်ဆေးရာ လိုင်စင်မဲ့ယာဉ်ဖြစ်ကြောင်း တွေ့ရပြီး လုပ်သေနတ်တစ်လက်၊ ခဲသီးရှစ်လုံး၊ ခဲသီးတောင့်ငါးတောင့်၊ ငွေကျပ် ၅၈၇ဝဝဝဝ ဖမ်းဆီးရမိသည်။ ယာဉ်မောင်းသူ၏ နေအိမ်သို့ သွားရောက်ရှာဖွေရာ WY စာတန်းပါ စိတ်ကြွဆေးပြား ၄၇၆ဝဝ ပြား၊ ဘိန်းစိမ်း ၂၅ ကျပ်သား (စုစုပေါင်းခန့်မှန်း တန်ဖိုးငွေကျပ် ၄၇၆ သိန်းကျော်)၊ ပြောင်းရှည် တူမီးသေနတ်တစ်လက်နှင့် ပြုလုပ်ဆဲပြောင်းရှည် တူမီးသေနတ်တစ်လက် တို့ကို ထပ်မံသိမ်းဆည်း ရမိခဲ့သည်။

တနင်္သာရီတိုင်းဒေသကြီး ကော့သောင်းမြို့အနီးရှိ မြန်မာ့ပင်လယ်ပြင် အတွင်း တပ်မတော်(ရေ)မှ တပ်မတော်သားများ ပါဝင်သောစစ်ရေယာဉ်သည် ပင်လယ်ပြင်လုံခြုံရေး ဆောင်ရွက်နေစဉ် သြဂုတ် ၆ ရက် နံနက် ၂ နာရီခွဲခန့်တွင် ကော့သောင်းမြို့၏ အနောက်တောင်ဘက် ရေမိုင် ၃ဝ ခန့်အကွာ၌ မသင်္ကာဖွယ် စက်လှေတစ်စင်းကို တွေ့ရှိသဖြင့် သွားရောက်စစ်ဆေးရာ ထိုင်းစာတန်းနှင့် အင်္ဂလိပ်အက္ခရာ AM 1462 A ပါထိုင်းငါးခိုးဝါးလတ်လှေ တစ်စင်းကို မြန်မာနိုင်ငံသား တစ်ဦးနှင့်အတူ ဖမ်းဆီးရမိခဲ့သည်။

အထက်ပါဖြစ်စဉ်များမှာ သြဂုတ် ၆ ရက် တစ်ရက်တည်းတွင်တွေ့ရှိရသော သယံဇာတများကို တရားမဝင်နည်းလမ်းဖြင့် ခိုးထုတ်ရန်အနေအထား၊ ဖောက်ခွဲရေးပစ္စည်း၊ လက်နက်ခဲယမ်းနှင့် မူးယစ်ဆေးတို့ကို အချိန်မီဖော်ထုတ် တားဆီးနိုင်ရန် ဌာနဆိုင်ရာများ၊ ပြည်သူနှင့်တပ်မတော်၏ လုံခြုံရေးအသိ၊ လုံခြုံရေးသတိဖြင့် ပူးပေါင်းဆောင်ရွက်မှုများပင် ဖြစ်ပါသည်။    

Read 245 times Last modified on Friday, 18 August 2017 11:42